انا مولع بالشعر الشعبي العراقي
الحوار
انا احجيلك من صدك
ودمعتي بطارف عيني
ياحلوه اذانا الكبر
ابجي واعن خليني
هذا العمر راح انكضه
وتجاوز الستيني
ماعاد نفرزن هاالوكت
كلها تكول انطيني
ارجوك يمي من تجي
بحجي المحب حاجيني
ملهوف ومنك انتظر
كلمه بها تواسيني
مثل الطفل لامه يحن
حنيت الك ياعيني
تذكرني من جنه نجي
ونركب سوى تناغيني
واشتاك شوفك كل وكت
وتشتاك وتحاجيني
تدريني مرضي بالكلب
وبصابعك داويني
مجروح منك بالصدر
وجرحك تره ماذيني
يامحلى قصتك من قصص
مكتوبه وتراويني
يوميه جاي من الصبح
بلكت تجي تلاكيني
ماتذكر الايام المضنه
بيهن جمال سنيني
متقاربين احنه سوى
تذكرني لو ناسيني
(الكمر ) يشهد بالصور
من صرت بينه وبيني
حضنت جسمك من خفت
وانت الكلت حاميني
واعضاء جسمي ترتعد
وجني ابرد غطيني
ريحك مسك وعطر الورد
فاح بعطر ياسميني
انا ادري بيك انته زعلت
بس تستحي تحاجيني
غطيت رسمك بالورد
انت الكلت غطيني
خايف يشوفونك هلك
ومن الخجل تنسيني
اريد تحجي من صدك
انته جنت هاويني
تفاح خدك شكد حلو
ليمون منه اسكيني
محتاج بوسه من الثغر
مسعد اذا تنطيني
مشتعله ناري بالكلب
واريدك اطفيني
ماصدك بكل الحجي
شفت الغرام بعيني
ارجوك وياي اصطبر
اقبلني شيني وزيني
ماعندي غيرك بالخلك
انت الذي تواسيني ..
الأربعاء 20/10/2021
الحوار : بقلم / ياسين حمادي القرغولي
العراق
